សៀមរាប៖ លោក Akihiro Kato ប្រធានក្លិបអង្គរថាយហ្គើរ បានបង្ហោះសារមួយនៅលើបណ្តាញសង្គមហ្វេសប៊ុករបស់លោកហាក់បង្ហាញចម្ងល់ជាខ្លាំង បន្ទាប់ពីសហព័ន្ធកីឡាបាល់ទាត់កម្ពុជា បានបញ្ចេញបញ្ជីឈ្មោះកីឡាករ ២៤រូប ដែលនឹងត្រូវធ្វើដំណើរទៅចូលរួមប្រកួតវគ្គជម្រុះ FIFA World Cup នៅប្រទេសបារ៉ែន នាថ្ងៃទី ២៨ ខែឧសភាខាងមុខនេះ ខណៈក្លិបលោកគ្មានកីឡាករណាម្នាក់ត្រូវបានកោះហៅឡើយ បើទោះបីជាក្លិបកំពុងលេចធ្លោ និងឈរលើកំពូលតារាងនៃលីគកំពូលកម្ពុជាយ៉ាងណាក្តី។

លោក Akihiro បានសរសេរសារដែលមានខ្លឹមសារថា៖ "ពួកយើង (ក្លិប)​ ស្វាគមន៍ជានិច្ចសម្រាប់គ្រូបង្វឹក (ក្រុមជម្រើសជាតិ) ក្នុងការមកទស្ស​នាផ្ទាល់នៅក្នុងកីឡដ្ឋាននូវការប្រកួតរបស់កីឡាករក្លិបថាយហ្គើរ។ គ្រាបប់បាល់ដែលគេស៊ុតចូលថាយហ្គើរមានតែ ៣គ្រាប់ប៉ុណ្ណោះ ហើយក្លិបកំពុងឈរនៅលេខ១។ សូម្បីតែអ្នកចាំទី និងខ្សែការពាររបស់យើងក៏សុទ្ធតែជាកីឡាករខ្មែរ និងមានវ័យក្មេងៗផងដែរ។ ខ្ញុំពិតជាសុំទោសចំពោះកីឡាកររបស់យើង"។

គួរបញ្ជាក់ថា សហព័ន្ធកីឡាបាល់ទាត់កម្ពុជា បានបញ្ចេញបញ្ជីឈ្មោះកីឡាករ ២៤រូប ដែលក្នុងនោះមានកីឡាករមកពីក្លិបវិសាខាចំនួន ៦រូប ក្លិបបឹងកេត ៥រូប ក្លិបណាហ្គាវើលដ៍,ព្រះខ័នរាជស្វាយរៀង,ភ្នំពេញក្រោន ៣រូប និងសមាជិកកូនពៅលីគកំពូលកម្ពុជាមានចំនួន ៤រូប៕